Vg2 Helseservicefag

Opplæringa i programfaga skal medverke til å utvikle evna til å yte service overfor kollegaer, pasientar og kundar, og til å samhandle med andre i yrkesutøvinga. Helseservicefaget skal gjere den enkelte sjølvstendig og medviten om eige ansvars- og kompetanseområde i ein kvardag prega av høgt tempo, samansette arbeidsoppgåver og utfordringar i arbeidsmiljøet. Opplæringa skal setje helseservicearbeidaren i stand til å arbeide raskt, effektivt og nøyaktig. Vidare skal opplæringa medverke til å utvikle etisk medvit, respekt for andre og evne til å kommunisere med menneske i ulike livssituasjonar og med ulik kulturbakgrunn. Opplæringa skal også medverke til å utvikle kunnskap om og vilje til aktiv deltaking i helse-, miljø- og tryggleiksarbeid.Opplæringa skal vere praksisnær, tverrfagleg og gi heilskapleg kompetanse. Opplæringa skal leggje grunnlaget for vidare opplæring innan helseservicefag.